مغـــــــــــــــــــرورة !

مغرورة





ما الومج بعد ماتسوه حسبت لوم
يالعفتي الحنان ورحتي للذلة
اسلوبج اعرفه وماكو شي مضموم
ورسمج بالظلام مغمض أندله
جرحي شماكبر يسهل علي ويهون
ولا ايدج تضمده بيوم وتشله
رفعت شراع صبري وأبحر بلياج
ومنج كافي كلبي يريد يتخله
لطلكَت الظلام الجنت عايش بيه
ما اقبل غرورج بيه يتسله
كشفت أوراق غدرج اعرف شما بيج
لغزج مو صعب يسهل علي حله
عانيت الأمر منج وأريد أنساج
لأن أنتي عجيبة اشلون من مله
أحس براحه انه وأنتي عني بعيد
وأيام العمر تتورد وتحله
جنت عايش ظلام وأنتي بي كابوس
ونموذج مثلج بهاي البشر قله
وجودج في حياتي ذنب مامغفور
وعذاباتي وضياعي ولوعتي وعله
ومجبور من اشطبج من حياتي الآن
تدرين بعذابج شأخذ وشخله
من عمري الكَظيته وياج بس آهات
مامجبور أجازف بالعمر كله
يبت الناس كلمن في طريقه يروح
واخذي اللي الج العنب والسلة
مغرورة الغرور البيج ميخليج
ودربج مو صعب والأعمى يندله
من طبع الجذب مايخدم الإنسان
ولايوم السفح عالجبل يتعله
يالعمرج ضياع وأنتي غيمه صيف
وعلى بعضج غلط واحجايتج زلة
ظنيتج حقيقة وبيج طبع إنسان
شيصحي ضميره الينكت أبخله؟
اتحملت الذنوب وكلت ايجوز
الذنب اللي عدهه اتقره وتمله
ما اجرعج بعدما بيهّ عالشوغات
أذا اجرع النخلة شيجرع ألسله؟
هذا أخر كلام وقررت أنساج
احجيهه بصراحة وارفض ألذله